Metalezko edo metalezkoak ez diren piezen gainazalak tratatzeko prozesua da Artezketa, hainbat estaldura aplikatu ondoren egiten dena, eta akabera doiak eta dimentsio zehatzak lortzeko erabiltzen dena. Urradura bidezko mekanizazio-eragiketa da; harri urratzaile batekin, material kantitate txikiak kentzen dira. Artezketaren helburu nagusia da gainazal leun eta uniformea lortzea, nahi den zimurtasuna izango duena, irregulartasunak kentzea eta piezen doitasun dimentsionala hobetzea.

Artezketa-prozesuan, artezteko makina edo ZK makina erabiltzen da, ardatz birakari batean muntatuta dagoen harri urratzailea duena. Arteztu beharreko piezak makinak duen finkagailu batean jartzen dira, eta harriaren ekintza urratzailea jasaten dute. Nahi diren emaitzak lortzeko, langileak kontu handiz doitzen ditu prozesuaren parametroak, hala nola harriaren biratze-abiadura, piezaren aurreratze-abiadura eta ebaketaren sakonera. Barne- zein kanpo-diametrotan egin daiteke prozesu hori, bai eta gainazal lauetan ere. Adituak gara Kromo Gogorra, zeramikak, karburoak, kobrea eta aleazio gogorrak bezalako estalduren artezketan , Proiekzio Termiko bidez (Plasma edo HVOF) lortutako estalduretan.

Artezketa-prozesuan, harria biratu egiten da eta piezaren gainazalean zehar mugitzen da, pasaldi bakoitzean material kantitate txikiak kenduz. Doitasunezko prozesua da, eta beharrezkoa da langileak trebezia eta esperientzia izatea, piezak kaltetu ez ditzan eta beharrezko akaberak lor daitezen. Forma eta konposizio ezberdineko harri urratzaileak daude, material eta berariazko akabera ezberdinei egokitzen zaizkienak. Zimurtasuna doitzeko duten eginkizun nagusiaz gain, artezketak doitasunezko super-akaberak eta leunketak lortzeko aukera ematen du, piezen gainazalaren kalitatea are gehiago hobetuz.

Lurreratze-trenen piezen kasu zehatzean, hauxe da ohiko aplikazio-prozesua: Shot Peening prozesua da lehenengo urratsa, nekearen aurreko erresistentzia hobetzeko erabiltzen dena; eta, ondoren, kromo-estaldura edo HVOF aplikatzen da. Amaitzeko, geruzaren artezketa egiten da, erabilitako estaldura motari dagokionaren arabera, nahi diren amaierako ezaugarriak lortzeko.

Artezketak erabilera oso hedatua du industrian, batez ere doitasun dimentsional handia eta akabera fina behar duten pieza eta osagaien kasuan. Hona hemen artezketa bidez tratatu ohi diren piezen adibide batzuk: motor eta makinetarako ardatzak, kojineteak eta errodamenduak; gainazal zilindrikoak, hala nola transmisio-ardatzak eta balbulen zurtoinak; gainazal lauak, adibidez, bermakuntza-plakak, turbina-besoak eta makina eta motorren karkasak; zuloen barne-gainazalak, zilindroen eta zorroen barne-gainazalak, esaterako; eta lurreratze-trenen piezak. Urradura bidezko mekanizazio-prozesu honek kalitate handiko emaitzak lortzeko aukera ematen du, industria-aplikazio ugaritan piezen doitasuna eta funtzionalitatea hobetuz.

Artezketa-prozesua oso hedatuta dago industria-sektore ugaritan, akabera doiak lortzeko eta piezen kalitatea hobetzeko duen gaitasunari esker. Ohikoa da prozesu honen erabilera aeronautikan, energiaren sektorean eta ondasun-ekipamenduenetan, izan ere, kalitate-estandar eta errendimendu handiak lortzea bilatzen dute.

Mekanizazio-teknika horrek funtsezko eginkizuna betetzen du fabrikazio modernoan, industria-arlo anitz horietan piezen funtzionalitate eta errendimendu optimoa bermatuz.

TTT Group-en, dagozkion ziurtagiri aeronautikoak ditugu, eta horrek prozesuak aplikazio aeroespazialetan eta industriako beste sektore batzuetan kalitate-estandar handienekin aplikatzea bermatzen du.